Frakshon Coffie awor sí ke splikashon tokante problema ku rotònde na Kaya Amsterdam

Kralendijk- Frakshon Coffie a manda un karta pa Kolegio Ehekutivo pa manda notifiká esaki ku awor, despues di kasi 4 luna, nan ke haña kontesta konkreto tokante e lokual ta pasando ku e rotònde ku lo mester a konektá entre otro Kaya Amsterdam ku kaminda djabou.

“Dia 11 di aprel 2021 ta eksaktamente 4 luna ku a sera e rotònde na Kaya Amsterdam ku e partisipashon ku lo mester hasi un investigashon pa haña sa si e proyekto aki a keda ehekutá korektamente. Relashoná ku esaki, ya 17 di yanüari 2021 mi a dirigí un karta na Kolegio ku 8 pregunta i sup-pregunta pa haña aklarashon riba e situashon i mas ku tur kos ki dia por a spera ku lo a terminá e proyekto i kontinuá ku rehabilitashon di Kaya Amsterdam i despues Kaya Gobernador Debrot” asina miembro di Konseho Insular Daisy Coffie ta skibi.

Coffie ta bisa ku lamentablemente e no a risibí ningun reakshon riba e preguntanan menshoná den e karta di 17 di yanüari 2021. “Mas di lamentá ta ku te dia di awe ningun pero ningun informashon ofishal no a sali di parti di gobernashon pa responsabilisá e situashon na komunidat di Boneiru, e pagadó di belasting ku tin e derecho di por kore riba kareteranan bon i sigur. E úniko informashon ku a sali ta un deklarashon di e direktor nobo di R & O ku a laga hasi un investi-gashon i ku tanten no tin resultado di e investigashon no ta responsabel pa habri e rotònde pa tráfiko”, segun Coffie.

Falta di rèspèt

Coffie den su karta ta nota tambe ku e situashon ta tambe un falta total di rèspèt pa e usuarionan di ekaretera-nan, ku diariamente mester trafiká riba nos isla pa kumpli ku nan obligashon-nan diario, manera bai trabou, hiba e trese mucha skol, transporte di servisio i produktonan.

Coffie ta sigui skibi ku e no por konkluí otro ku e situashon ta un muestra di inkapasidat total di Kolegio Ehekutivo. “Pa tal rason, mi ke urgi Kolegio Ehekutivo pa den un forma inmediato pone na disposishon di Konseho Insular e rapòrt di e investigashon relashoná ku e rotònde pa asina Konseho Insular(komunidat) por tuma nota di e resultado di e investigashon i e rekomendashonnan ku a keda hasí pa remediá e situa-shon, indikando tempu den kua e rehabilitashon aki lo tuma lugá i e rotònde lo keda habrí pa tráfiko”, asina Coffie ta eksigí.

Gastu

Tambe e miembro di Konseho Insular ke sa di Kolegio Ehekutivo kiko e konsekuensia finansiero ta di e retraso ta e di eventual korekshon ku tin ku bai hasi na e konstrukshon.