Infrastruktura

Frakshon Coffie ku vários pregunta tokante desoroyo di Bachelor’s Beach

Bachelor’s beach manera e ta aktualmente. Pòtret: AworBonaire

Kralendijk- Daisy Coffie di Frakshon Coffie a presenta vários pregunta na BC pa loke ta trata e plan di desaryo di Bachelor’s Beach, òf playa Fòrni Kalki.

Coffie ta skibi den su karta ku den medionan di komunikashon sosial a sali un anunsio di parti di Kolegio Ehekutivo kaminda nan ta informá ku pronto lo kumin­sá ku remodelashon di e playa. Esaki basá riba un diseño di un ar­kitek­to lokal di algun aña pasá.

“Loke a hala mi atenshon ta ku e deklarashon ta papia di Gobièrnu i Partners sin a duna un splikashon adishonal riba esaki. Den komunidat pero tambe serka ami a lanta e pregunta ta ken ta e partnersnan ku huntu ku gobièrnu ta bai realisá e proyekto aki. Lo ta bon pa Kolegio Ehekutivo splika esaki mas detayadamente”, asina Coffie ta skibi.

Pregunta

Coffie a formulá bastante pregunta konkreto tokante e proyekto i, relatá na esei tambe tokante pregunta general di maneho di e playanan na Boneiru:

  1. Kua ta e maneho ku Kolegio Ehekutivo a stipulá pa ku remodelashon, renobashon di nos Playanan Públiko? Kolegio Ehekutivo por a fasilitá e maneho ei na Konseho Insular?
  2. Kolegio Ehekutivo por a menshoná e Playanan Públiko ku ta bin na remarke pa ehekushon di tal maneho?
  3. Kolegio Ehekutivo por a kompañá e maneho menshoná ku e presupuesto korespondiente di e aña aki i posiblemente di mas aña?
  4. Kolegio por a informá Konseho Insular ku si e Playanan ku tin a lo largu di nos kostanan kaminda tin konstrukshonnan privá ta aksesibel pa públiko? Si no ta asina pakiko esaki ta?
  5. Nos a tuma nota ku tin proyektonan kantu di kosta ku ta kobra pa hende sinta na Playa. Kolegio por a informá Konseho Insular si esaki tin un base  legal?
  6. Pa loke ta e Playa konosí komo Fòrni Kalki (Bachelor’s Beach) kiko ta e maneho ku Kolegio Ehekutivo a stipulá pa uso públiko?
  7. Na ken Kolegio Ehekutivo ta referí ku e deklarashon “Go­bièr­nu i Partners” ora a anunsiá e proyekto di renoba­shon di Playa Fòrni Kalki (Bachelor’s Beach)?
  8. Kuantu e ehekushon di e Playa Fòrni Kalki lo kosta i kiko ta e kontribushon di e asina yamá “Partners” i ki derecho spesial a otorgá na e “Partnersnan” pa uso di e Playa dor di nan klientenan?
  9. Lo tin un destaho públiko pa ehekushon di e renobashon di Playa Fòrni Kalki o ta un “onderhandse gunning” ta bai tin?
  10. Si ta bai tin un “onderhandse gunning” ken ta e kompania­nan ku a òf lo keda invitá pa entregá proposi­shon?
  11. Kolegio Ehekutivo lo pone e plan di renobashon di Fòrni Kalki pa públiko por entregá opheshon i ki dia por spera esaki?
  12. Ki plan tin a korto plaso pa e playa konosí komo “Te Amo Beach”?

Kritiko

Coffie, ku su preguntanan, ta vosiferá hopi inkietut ku tin ta biba den komunidat pa loke ta maneho di a playanan, pero tambe tokante motivashon pa drecha sierto playanan i otro no. Entre otro hopi hende ta puntra si tin akuerdo ku doñonan di proyektonan serka ku lo desaroyá e bich aki, e tambe si esaki ta bai afektá aksesibilidat di e bich konserní.

Deel dit artikel
Rocargo
Rocargo
Rocargo
Rocargo