Kralendijk- Miembro di Konseho Insular, Daisy Coffie a skibi un karta pa bezaghèber Edison Rijna en konekshon ku un petishon di e ‘bewindvoerder” di BOPEC pa a fia un suma di 250 mil dolèr di teritorio insular.

“Gezaghèber a informá nos den un presidio ku a drenta un petishon pa un fiansa di 250 mil dòler for di e “bewindvoerder” den e kaso di “surséanse van betaling” ku Korte a duna BOPEC. Gezag a keda di duna nos informashon adishonal durante e siman. Entre tantu nos a tuma nota ku Korte a deklará BOPEC fayit. Kiko esaki ta enserá den e totalidat aki?”, asina Coffie a puntra.

Coffie ta mustra riba e echo ku te asina leu, OLB siempre a para riba punto ku no ta mete den BOPEC . “Biniendo bèk riba e petishon pa fiansa di 250 mil dòler. Na tur okashon OLB a mantené e posishon di lo no mete den BOPEC, argumentando ku gobièrnu no por mete den un kompania privá.  No mester lubidá ku biaha pasá kaba a duna BOPEC un adelanto di un montante semehante sin ku a buska aprobashon di Konseho Insular i sin ku a pone e adelanto aki riba papel ku e kondishonnan bou di kua a duna e adelanto”.

Advertensia

Coffie ta bisa ku komo miembro di Konseho Insular e ta atvertí Kolegio Ehekutivo pa no kometé e error di fia sèn na BOPEC. “Ta p’esei mi petishon ta pa Kolegio Ehekutivo manda tur dokumentashon detayá ku ta sostené e petishon di e “bewindvoerder/curator” pa Konseho Insular mas pronto posibel”, asina Coffie ta skibi. Coffie ta ekspresá tambe di mira tur e konsehonan di e departamentunan, mui en espesial esun di finansa na Kolegio ehekutivo.

Coffie ta sigui bisa ku ta Interesante pa sa kon ministerionan di Ulanda, en partikular RWS i ILT ta pensa, pero mas importante ta kon gobièrnu Ulandes ta pensa riba e situashon aki. Al fin al kabo nan ta ko-responsabel pa e debakel ku BOPEC a pasa aden.

---

Lesa tambe:

• 
  Por deskubrí historia di antepasadonan ku e buki ‘Archivo Spièrtá’
• 
  ZJCN ta introdusí mehorashon den seguro médiko pa islanan BES 
• 
  Marco van de Kreeke bèk na aeropuerto Flamingo komo di dos direktor 
• 
  Otro charla mas pa mayornan tokante uso seif di medionan sosial serka mucha
• 
  Entrega di Kalènder 2025 “Ban Topa Nos Grandinan” na Gezaghèber John Soliano