Kralendijk- Den un karta fuerte ku un avalancha di pregunta konsehal Daisy Coffie ta duna su reakshon riba e kontesta ku el a haña di gezaghèber relashoná ku su karta tokante e problemátika di BOPEC i riba e desishon di gobièrnu di Boneiru pa duna fiansa na e kurátòr di BOPEC.

Den su karta Coffie ta trese e siguiente pregunta- i remarkenan dilanti. Na promé lugá Coffie ke sa riba kua maneho ta basa e echo ku gobièrnu ta pone sèn disponibel pa kubri gastunan operashonal di e kompania ku a bai fayit?

Coffie ta puntra si ku esaki no ta krea presedente pa loke ta trata otro kompanianan Tambe e miembro independiente ta nota ku ta parse ku tin violashon di algun prinsipio di bon gobernashon, manera e prinsipio di siguridat hurídiko, prohibishon di arbitrariedat i e prinsipio di igualdat.

Motivashon

E motivashon di gobièrnu ku ta trata aki di riesgonan di siguridat relashoná ku medio ambiente, hende i naturalesa i posibel sabotahe no ta kita nada for di esaki. Tambe Daisy Coffie ta skirbi ku no ta kompletamente kla kon Inspekshon di Ambiente di Biba i Transporte (ILT) por deklará ku tin kestion di un situashon insigur – defakto sin indiká ta di kiko e insiguridat ei ta konsistí -, miéntras ku e mesun ILT ei a laga pòmp tur produkto di zeta for di e tankinan ku nan a kùr af pa tankinan ku nan a kùr bon.

“Ta inkomprendibel ku Kolegio Ehekutivo ta konformá su mes ku esei i ta pone sèn disponibel tambe. Esaki pasobra hasta si lo tin kestion di un situashon insigur, e ora ei ainda esei no ta responsabilidat di gobièrnu di Boneiru sino di Gezaghèber i eventualmente Hulanda c.q. ILT”, asina Coffie ta skibi den su karta.

Coffie ta konklui un biaha mas ku salbaguardiá siguridat di kompanianan priva no ta tarea di gobièrnu.