KRALENDIJK – Djasabra DaisyCoffie di Frakashon Coffie a hasi un bishita na Punta Cardon, no na Venezuela pero na Rincon. Punta Cardon ta kunuku di yùfrou Maria Koeks na frontera di Rincon, Kaminda di Karapata. 

Según Frakshon Coffie ta splika, ántes nos grandinan ku a nabegá tabata duna nan kunuku nòmber di lugánan den eksterior ku nan a bishita p’esei e nòmber Punta Cardon. Frakshon Coffie konosé yùfrou Maria di su Sòldachi Tours den Rincon. E kunuku Punta Cardon ta un desaroyo ku yùfrou  Maria a agregá komo atrakshon èkstra den kuadro di Sòldachi Tours.  

E desaroyo aki a wòrdu stimulá dor di e programa di POP ku ta “Plattelands Ontwikkeling Programma”. Yùfrou Maria a invitá Frakshon Coffie na diferente okashon i porfin e oportunidat a yega pa por a kumpli. Durante e bishit Frakshon Coffie a duna splikashon di su plannan i tambe su inkietutnan.  

Sostén

Yùfrou Maria a ekspresá ku e ta sinti falta di sosten –spesialmente di konosementu- pa yuda desaroyá e produkto. Loke a bin dilanti ta ku bo ta haña desaroyonan basá riba proyektonan pero na momento ku e proyekto kaba ta keda un bashí i no tin sosten mas pa sigui ku e desaroyo. 

Dos ehèmpel a bin dilanti esun di desaroyo di Rincon ku Plataforma Rincon tempu ku Ben Oleana komo kordinadó a dirigí e desaroyonan i despues mas resien e proyekto di POP.  Dos bon desaroyo, pero ora e proyektonan a kaba ta keda un bashí i esun ku a partisipá den e desaroyo ta keda ku falta di sosten. I pa ta hopi kla, no ta trata di sosten finansiero so, pero mas bien konosementu i tin ora tambe man di obra. Algun ehèmpel: supsidio pa man di obra, pa limpiesa òf mantenshon di instalashonnan p.e. e molina den e kaso di Punta Cardon. 

Struktura

Mester krea maneranan mas strukturá pa sostené tipo di desaroyonan asinaki i no a base di proyekto so. Nos hendenan/empresarionan chikí tin un desbentaha kaba, ku ta falta di kapital. Dor di esaki nan ta keda tras serka esun ku ta bin di eksterior ku kapital i ta krea desaroyonan grandi i ekstenso sin mester di ningun ayudo. E mensahe mester ta kla, mester duna mas sosten na nos hendenan.