KRALENDIJK- Direktiva di Fundashon Alzheimer Bonaire (FAB) a tene e último anochi di informashon komo klousura di su Programa di aña 2024 djabièrnè último, 19.00or den sala di Scouting na Kaya Nrd Nikiboko # 2.

Aktualmente Henk van Dort ta na Boneiru, e ta un spesialista riba tereno di ”belevingsgerichte benadering dementie”, esta un sistema ku ta dirigí riba e manera kon un persona ku demensia ta sinti i ta eksperensiá esaki.

Direktiva a hasi uzo di e oportunidat aki pa aserká Van Dort ku e petishon pa e tene pa dunadónan di kuido i famia di personanan ku demensia un tayér ku e tema: “Demensia & amistat, kon awor?” sr van Dort a bai mésora di akuerdo ku e petishon.

Van Dort no ta un deskonosí na Boneiru i sigur no pa Fundashon Alzheimer Bonaire, komo ku durante su bishitanan den pasado aki nan, un par di biaha el a yega di tene charla kaba durante anochinan di informashon di FAB.

E  biaha aki tabata un éksito atrobe pa tur e dunadónan di kuido, interesadonan i entre nan algun profeshonal den kuido.

Satisfakshon

Direktiva di FAB ta mira ku satisfakshon bèk riba un tayér hopi eksitoso. E tema tabata sigur mashá adekuado pa e presentenan por a haña oportunidat pa amplia nan konosementu riba e tereno aki i pa asina nan por bai pone esaki den práktika tambe. Tabata un bunita klousura dje aña pa e direktiva i tur esnan presente ta ansioso pa ku e aktividatnan di 2025.