KRALENDIJK/WILLEMSTAD- Fundashon Mariadal i e kompania Kolombiano Sarpa SAS no a logra ku wes a dikta un sentensia na nan fabor pa loke ta trata e pèrmitnan nesesario pa por bula entre e islanan di anterior Antia Hulandes i Aruba.

Mariadal i Sarpa a entamá un kaso kotra di minister Charles Cooper di VVRP komo e minister enkargá di entre otro Curaçao Civil Aviation Authorities (CCAA) i Dutch Caribbean Air Traffic Navigator (DC-ANSP) pa eksigí ku esaki mester a permití Sarpa pa ehekutá e buelonan aki.

Hinter e problemátika a start na momentu ku Mariadal a terminá un kòntrakt di kasi 23 aña ku e kompania lokal Medicair BV establesé na Boneiru pa ehekutá buelonan di ambulansia pa e hospital. Na su lugá Mariadal a sera un kombenio ku e kompania Kolombiano, Sarpa S.A.S.

Outoridatnan na Kòrsou a nota sin embargo ku Sarpa no tin outorisashon pa ehekutá e buelonan aki, ya ku ta solamente kompania ku ta establesé na un di e seis islanan tin e derechonan aki.

Durante tratamentu di e kaso, ku por sierto a dura largu i kaminda a skucha hopi hende, Mariadal i Sarpa a boga ku den pasado a laga Sarpa ehekutá sierto buelo i pa e motibu ei, awor tambe e kompania lo ta outorisá pa bula entre e islanan.

Gobièrnu

Di parti di Gobièrnu di Kòrsou a refutá e ponensia di Mariadal i Sarpa, mustrando ku sin permitnan nesesario, i sin ta establesé na un di e islanan e kompania -siendo un kompania stranhero- no por hasi e tipo di buelonan aki. Igualmente, e outoridatnan a bisa, un kompania establesé na e islanan, manera Z-Air, tampoko por bula entre dos siudat na Colombia.

No-outirsá

Wes Martines den su veredikto a repasá tur e argumentonan di ambos banda i finalmente a yega na e konklushon ku Korte Komun no ta outirsá pa yega na un areglo temporal òf di urgensia pa loke ta trata outorisashon pa e buelonan aki.

E wes a konsiderá tambe ku no por papia di nengamentu di pèrmit di banda di Minister Cooper, pero ku vários e-mail ku a ser mandá pa Sarpa i Mariadal simplemente tabata un rekordatorio di kon e reglanan ta i pa taha Sarpa i Mariadal pa no ehekutá buelonan pa kual nan no tin e pèrmitnan nesesario.

Kompania lokal

Un punto ku tambe a konta den e kaso aki ta e echo ku debidamente tin un kompania lokal ku por ehersé e buelonan di ambulansia, esta Medicair, i pa e banda ei tampoko no ta nesesario pa desvía for di areglonan i protokòl vigente di loke ta permití un kompania djafó bula si òf nò.

Dor di e forma ku korte ta traha awendia, tambe mester nota ku no ta posibel pa apelá e veredikto di wes aki. Esaki ta nifiká ku fundashon Mariadal lo tin ku sinta bèk na mesa ku Medicair òf bin ku otro solushon ku sí ta pas den reglanan, pèrmit i protokòl di aviashon eksistente.