KRALENDIJK – Riba 4 di sèptèmber Gang di Arte Bonaire a start ku un tayer di DJ pa un total di seis hóben di entre 13 i 15 aña. Den koperashon ku Jeugdhuis Jong Bonaire Gang di Arte ta ofresé kuater biaha pa siman un ora di lès na e hóbennan aki, kaminda nan ta haña e oportunidat pa profundisá nan mes den e arte di DJ. E DJ-nan ku ta guia, Jaimy Andul i Jerrysen Albertus, mihó konosí komo DJ Orleus i DJ Panter/MC Jerr-Y, a sigui un kurso intensivo serka DJ Laennon di Kòrsou. 

Durante e seshonnan e DJ-nan hóben a mehorá nan kapasidatnan komo DJ i a traha na nan propio logo, ku pronto lo aparesé den forma digital. Pronto Boneiru lo sera konosí ku e DJ-nan hóben aki, ku lo ta kla pa entretené tantu oyentenan hóben komo di mas edat.

Gang di Arte Boneiru ta un proyekto di Art Culture Education Foundation, ku e meta pa ofresé hóbennan e posibilidat di eksplorá, deskubrí i desaroyá nan mes den diferente forma di arte. Nan ta haña guia di profeshonalnan i e chèns pa haña eksperensia riba un podio. Tambe ta duna nan guia den nan trayektoria pa bai siña arte den eksterior. E sektor di arte i kultura pa tempu largu no a haña e atenshon ku e meresé, mientras ku den hopi pais e ta un di e insentivonan ekonómiko mas grandi.

Gang di Arte Bonaire ta invitá tur artista hóben òf esnan ku ke hasi algu artístiko pa tuma kontakto via nan página di Facebook, ACE Bonaire, òf na telefon +599790-0155.