KRALENDIJK- Gezaghèber Edison Rijna, durante konferensia di prensa relatá na e tema di Covid-19 djarason a hasi un apelashon riba doñonan di trabou pa laga empleado ku ta malu, òf ku mester bai den karentena preventivo, keda kas trankil. 

Segun Rijna a bisa, a yega hopi informashon di hende ku lo mester keda kas sea pasombra nan ta malu òf pasombra nan tabata den kontaktu ku otro hende ku a keda diagnostiká ku Covid. Lógikamente, asina Rijna a trese dilanti, si hende ku potensialmente a pega ku e virus di Corona i nan ta bai traha tòg, esaki no ta yudando e kousa di perkurá pa e virùs no sigui plama na Boneiru. 

Tambe ta tende ku tin trahadó ku no ke keda kas, pa miedo ku nan lo no risibí salario pa e dianan ku nan tabata ousente. 

Areglo

Gezaghèber a rekordá doñonan di trabou riba nos isla ku SZW tin un areglo spesial ku ta kubri gastunan salarial di empleado ku pa motibu di infekshon òf isolashon preventivo, no por yega trabou. 

Reina a enfatisá tambe, ku kontagio na trabou ta un di e áreanan ku ta mirando ketu bai mas kontagio ta tumando lugá, huntu ku akohida di mucha, na skolnan i na kas di famial.