KRALENDIJK- Djaweps gezaghèber Oleana a bishitá e área afektá. El a bai den kòmbersashon ku entre otro empresarionan, STINAPA i e militarnan ku a bin ofresé yudansa. Oleana ta hopi kontentu ku yudansa di tur e outoridatnan ku a duna un man ku limpiesa di nos laman i kosta, i el a gradisí nan pa nan esfuerso. ‘Ta bunita pa mira ku den un tempu kòrtiku huntu nos por pone pasonan grandi i ku e empresarionan den e área afektá por habri nan negoshi atrobe.

E mesun anochi akí Oleana a disidí ku e área na Sorobon ta habri atrobe riba djabièrnè 1 di mart for di 9 or. Despues di un konsiderashon kuidadoso i den bon konsulta ku empresarionan i ekspertonan lokal a disidí ku públiko ta bon biní atrobe na Sorobon. 

No drenta laman

Oleana ta duna e konseho urgente sí pa no drenta laman i no bai piska. ‘No a saka tur petroli for di e awa ainda. Tambe te ainda por tin restu chikitu di petroli riba bich. Si inesperadamente un hende bin den kontakto ku e petroli akí tòg, e ora ei mester lab’é mesora. E empresarionan na Sorobon tin awa i habon disponibel.’

Te ainda tin trabou di limpiesa ta tumando lugá riba e bich pegá ku e miradó. A sera e parti akí i e no ta aksesibel pa bishitante. Pa mas informashon i kontesta riba preguntanan mas tantu hasí nos ta referí na www.bonairecrisis.com