Notisia

Gezaghèber Rijna den spich pa aña nobo: Reto, pero tambe oportunidat den aña 2023

Un bista di e tradishonal resepshon di aña, kaminda gezaghèber Rijna a tene su konkurso. Pòtret: ABC Online Media

Un bista di e tradishonal resepshon di aña, kaminda gezaghèber Rijna a tene su konkurso. Pòtret: ABC Online Media

KRALENDIJK- Gezaghèber Edishon Rijna, a papia ku esnan presente durante durante e enkuentro riba e patio dilanti di ofisina prinsipal di gobièrnu. Esaki a tuma lugá djaweps 12 di yanüari.   

“Na Pueblo humilde i semper kontentu, un felis aña pa un i tur. Di kurason mi ta spera e aña’ki, trese un airu positivo pa boso tur i na nos Boneiru, kambionan progresivo. Aña 2022 tabata un aña ku hopi turbulensia den komienso, ta parse leu, pero un aña pasa. 

Den e periodo aki, hopi regla ku e asuntu di Covid-19, ainda tabata konta. Pero nos a sa di enfrentá esaki i salí afó komo mihó hende i komo un pueblo aun mas uni. Maske ku e pandemia di Covid-19 a mengua, ta importante pa nos keda kuida nos mes i e salú.

Loke mi ta deseá, pa nos kontinuá den e aña’ki, ta e amor i kariño pa ku otro. Si bo por yuda un konosí, bisiña òf amigu ku ta den pèrtá, no keda sin hasi esei, yuda!

Tambe nos a eksperensiá un subida astronómiko di kosto di bida den e último tempu na Boneiru. E aña’ki ta riba nos agènda pa sigui traha pa desaroyá mas previshon pa nos Bonerianonan. Nos ke baha kosto di bida i sigui traha riba subida di e salarionan. Un stap importante ku  Hulanda a tuma den fin di aña, pa pidi despensa pa sklabitut i tur loke esaki a trese kuné. 

Ban mira awor pa un futuro briante kaminda nos ta  traha huntu pa tur hende i asina krea un situashon ekivalente, o mihó, ku bida na Hulanda Oropeo. Pa nos premirá aña 2023: E aña’ki nos ta bai tin algun dianan importante, mas fin di luna aki nos ta bal risibí Rei  i famia real, tambe nos ta bai selebrá karnaval i dia di Rincon den grandi atrobe.

Tin elekshonnan di Konseho Insular i indirektamente pa Eerste Kamer na Hulanda Oropeo. Mi ke for di awor, hasi un apelashon riba tur hende, pa hasi uso di nan derecho di vota, demonstrá bo sentido síviko i kumpli ku nos deber formando parti di un demokrasia bibu.

Un biaha mas hasi uso di bo derecho di voto dia 15 di mart binidero. Manera nos mes por ripara, komunidat di Boneiru ta sigui krese, esaki ta trese retonan nobo kuné, pero tambe oportunidatnan pa nos krese yega na otro, asina nos por siña tambe di otro i kontribuí na desaroyo di nos isla.

Por último mi ke bisa un i tur: karga bo responsabilidat pa  bo mes i kuida kurpa i tur otro rondó di bo. Paso, maske chikitu ku su defekto, nos ta stima nos Boneiru ariba tur kos.”

Deel dit artikel
Rocargo
Rocargo
Rocargo
Rocargo