Notisia

Gezaghèber Rijna ta felisitá dos profesional hoben ku partisipashon na programa Europa

KRALENDIJK – E hóbennan Terrence Janssen i Michélin Padmore lo representá Boneiru otro aña den e nètwèrk di hóben di Pais- i Teritorionan Ultramar (LGO), un inisiativa di Direktor General pa Aliansa Internashonal (DG INTPA) di Komishon Europeo.

Meta di e inisiativa akí ta pa entre otro pone hóbennan di vários isla den kontakto ku otro, ku institushonnan europeo i ku tumadónan di desishon i krea un entendimentu mas profundo tokante loke Union Europeo por nifiká pa islanan. Banda di esei, e nètwèrk ta pone ku e hóbennan por interkambiá informashon i haña eksperensia den koperashon internashonal. 

E nètwèrk ta konsistí di 25 hóben for di diferente isla. Nan lo partisipá na un programa i den esei biaha vários biaha tambe pa e ofisina prinsipal di Union Europeo na Brusélas. Ku esfuersonan kombiná di entre otro e programa di TOP i e sekshon internashonal di Gabinete di Gezaghèber, pa promé biaha Boneiru a logra haña dos hóben den e programa akí.

Kontentu

“Mi ta kontentu ku a tuma dos hóben ambisioso di Boneiru den e programa. Mi a papia personalmente ku nan i entre otro a trese dilanti kon nan por kompartí nan eksperensia na Boneiru tambe, pa asina inspirá otro kompañeronan hóben. Mi felisitashon kaluroso ta bai pa e dos young professionals akí”, asina Rijna a trese dilanti durante un enkuentro ku e hóbennan.

Deel dit artikel
Rocargo
Rocargo
Rocargo
Rocargo