KRALENDIJK – Pa medio di un deklarashon gabinte di gezaghèber Edison Rijna a konfirmá ku e aña aki, manera ta kustumber, por tira vürwerk pa kambio di aña for di 31 di desèmber 2021 te ku 1 di yanüari 2022.

Alabes ta rekordá tur hende ku pa tiramentu di vürwèrk pafó di e periodo menshoná akí riba i pa tiramentu di vürwèrk grandi, manera pagara, ta eksigí un pèrmit.

Eksepshon

Tiramentu di vürwèrk no por tuma lugá dentro di un rayo di 250 meter for di hòspital i kas di kuido i edifisionan kaminda ta tene sirbishi religioso. No ta pèrmití tampoko pa tira vürwèrk dentro di un rayo di 250 meter for di pòmpnan di gasolin i sitionan di almasenamentu di supstansianan inflamabel i eksplosivo.

Tiramentu di vürwèrk ku ta bai haltu no mag tuma lugá na un sitio kaminda esaki por okashoná peliger pa tráfiko aéreo. No opstante e dispensashon general akí kada hende ta keda responsabel pa eventual leshon òf daño ku nan a kousa na kualke persona, bestia òf bienes.

Responsabel

Pa evitá daño i aksidente, gezaghèber ta hasi un apelashon na tur hende pa kumpli ku e medidanan di prekoushon i e koutela nesesario na momentu di tiramentu di vürwèrk. Manera tenementu di e distansia nesesario na momentu di tira vürwèrk i tira vürwèrk solamente manera nan ta indiká den e  instrukshonnan i bou di ningun sirkunstansia no tira vürwèrk riba hende òf bestia.