ORANJESTAD – Ayera a habri e di 37 aña parlamentario na Aruba for di dia ku a optené Status Aparte na 1985. E apertura tabata na enkargo di Gobernadó di Aruba, Alfonso Boekhoudt.

Den su diskurso el a splika e metanan i e vishon pa e aña parlamentario entrante. E tema ta: Huntu nos lo lanta para.

El a menshoná e tempunan difísil ku Aruba ta pasando aden despues di e pandemia ku a asotá e isla. Disiplina finansiero, reforme di impuesto i retonan sosial tabata forma e nukleo di su mensahe

Meta di e gobièrnu ta pa redusí e debe i kumpli ku rekomendashonnan di Internationaal Monetair Fonds i e palabrashonnan ku a traha ku Hulanda.

Gobernadó a elaborá tambe riba e historia di sklabitut. Reino Hulandes ta rekordá otro aña ku ta 160 aña pasá ku a abolí sklabitut. Segun Gobernadó e tema aki no ta biba asina hopi riba e isla, apesar di e echo ku tabatin algu mas ku 500 hende riba e isla ku nan a hasi katibu.