Gobièrno ta kambia sistema di raportá sifranan diario di Covid

Kralendijk – Departamento di Salubridat Públiko a hinka e resúmen diario di  sifra di COVID-19 den un bachi nobo. Ta kuminsá usa e resúmen nobo for di 15 di aprel i e ta konsistí di seis blòki ku sifra, tres den un rei ariba i tres den un rei abou.

Den e rei mas ariba den e promé blòki ta menshoná e kantidat di tèst positivo. Ta indiká tambe ku kuantu e kantidat aki a baha òf subi kompará ku e dia anterior. Den e blòki meimei a pone e kantidat di kaso aktivo, aki tambe ku anotashon si a bini kaso aserka òf ku tin un bahada. E di tres blòki ta indiká e kantidat di tèst negativo.

Den e rei mas abou ta menshoná den e promé blòki e kantidat di hende ku a tèst. Den e blòki aki ta indiká tambe ku sifra kuantu hende a tèst en total. E blòki meimei ta indiká e kantidat di hende ku a fayesé. Den e di tres blòki ta indiká kuantu hende ta den hòspital na nos isla i tambe kuantu pashènt di Boneiru ta den hòspital den eksterior.

Den e resúmen nobo no ta nota e kantidat di hende ku a rekuperá mas. Por dedusí e kantidat di hende ku a rekuperá a base di subida òf bahada di e kantidat di kaso aktivo. Den e resúmen nobo no ta pone e kantidat di hende ku ta den karentena. Debí na preshon haltu di trabou durante un brote no ta posibel pa prosesá e sifranan akí bon.

Importante

Departamento di Salubridat Públiko ta informá i monitoriá e hendenan ku mester bai den karentena. Den tempu drùk nan kontaktonan ku a tèst positivo mes ta informá nan. Den un kaso asina nan mes ta responsabel pa kompletá e periodo di karentena i pa mèldu nan mes ora nan tin keho. Ku e resúmen nobo departamento di Salubridat Públiko ta spera di diariamente hasi e sifranan mas importante klaramente visíbel, sin ku tin mester di hopi teksto aklaratorio aserka.