KRALENDIJK- For di aña 2014 tin un akuerdo firmá entre e kompania Bonaire Builders di direktor Herbert X.J. de Jong i Entidat Públiko Boneiru kaminda ta primintí ku e último lo asfaltá e kayanan rondó di e proyekto i pone tur otro kos ku ta relatá na infrastruktura, manera palu di lus. 

Den e akuerdo tin skibí ku Bonaire Builders lo a sòru pa sierto infrastruktura básiko manera drenahe i trahamentu i kaminda di tera. Despues Entidat Públiko Boneiru lo a soru pa kayanan asfaltá i tur otro aspekto di infrastruktura. E kombenio ta karga nòmber di gezaghèber Edison Rijna, pero den realidat a keda firmá pa diputado James Kroon. 

Remarkabel ta ku den e mesun artikulo 6, kaminda gobièrnu ta obligá su mes di asfaltá e kayanan tin poné ku ainda no tin un planifikashon konkreto pa esaki. Niun hende, sinembargo, lo por a pensa ku ocho aña mas lat, ainda gobièrno ni a hasi un komienso pa kumpli ku e kombenio aki. 

Perhudiká

Esanan ku ta realmente perhudiká ta esnan ku a kere den promesa di Bonaire Builders i gobièrnu di Boneiru ku tabata tin kla poné ku e kasnan lo ta situá den un bario ku kamindanan asfaltá. Voral den temporada di yobida e habitantenan di e kasnan aki, ku supuestamente ta un proyekto di ‘kasnan pagabel’ ta man na kabes, sin ku tin un klaridat ki dia porfin lo kumpli kabalmente ku tur kos ku a sea primintí dia di a presentá e proyekto i bende e kasnan en kestion.