ORANJESTAD – 31 di dezèmber awor ta e último dia ku lugá di dump sushi Parkietenbos ta habrí ofisialmente pa públiko, gobièrnu di Aruba ta informá. Ounke e infrastruktuta di un ekonomia sirkular pa resiklahe i otro asuntu no ta presente kompletamente ainda, tin sufisiente solushon segun e ministerio di Naturalesa pa por sera e sitio di dùmp sushi Parkietenbos.

Pa  públiko hopi no ta kambia. Serlimar ta keda rekohé sushi riba mésun dia i mésun orario manera ta e kaso te awor. Ta e intenshon si pa kada ken separá su sushi sea na kas òf na empresa.

Basura 

Pa hardinero, kontratista òf esnan ku ta hiba nan basura di kas na e sitio di dùmp sushi, tin diferente sitio nobo disponibel pa eliminá sushi a base di e tipo di basura.

Ku e siere aki Aruba ta pasa pa un sistema di sushi separá, ku diferente empresa di prosesá sushi lo bai prosesá. Asina Ecotech òf Johnsons ta bai prosesá sushi bèrdè.

Daltra òf ICR Services ta hasi esei ku metal, outonan bieu i bateria. APEX ta prosesá betòn i sushi di demolishon. Ecotech òf Carentra ta rekohé tayernan i Ecotech ta rekogé sushi di kas, di kurá i otro sushi.

No ta konosí ainda kiko ta bai sosodé ku plèstik, glas i otro sorto di sushi pa resiklahe. Tánten Ecotech ta prosesá e sushi.

Gobièrnu tin intenshon pa rehabilitá e sitio di dùmp sushi den un parke pa energia solar.