Notisia

Gobièrnu di Boneiru ke ménos plèstik den naturalesa

Diputado Hennysong Thielman mustrando e tas ku lo regalá na diferente supermerkado dia 25 di mei. Pòtret: EPB.

KRALENDIJK- Gobièrnu di Boneiru ku usa e dia International Plastic Free Day ta kai tur aña riba 25 di mei pa sigui konsientisá poblashon di importansia pa kombatí uso di plèstik ku ta resultá entre otro den nos naturalesa.

Entidat Públiko Boneiru (EPB) lo ke sigui ku e eliminashon gradual di produktonan di plèstik desechabel.

Na Boneiru ta haña hopi desperdisio di plèstik tirá abou, tantu riba bich komo den nos barionan. Na aña 2020 por ehèmpel mas ku 70% di e desperdisio ku hende a laga atras na Te Amo Beach tabata konsistí di plèstik. Den dos aña di tempu nan a haña kasi 10.000 felter di sigaria (nan ta kontené plèstik) einan. Tambe nan a topa ku richi, kuchara, fòrki, kuchú, tayó i tapa di bòter di plèstik. Na aña 2020 na sitionan públiko nan a mira prinsipalmente richi, kùp i bòter di plèstik.

Pa yuda redusí desperdisio di plèstik na Boneiru, na aña 2022 un prohibishon di plèstik desechabel a drenta na vigor. For di 1 di yüni 2022 ta prohibí pa bende saku, richi, kos di drai bibida kuné, kuchu, fòrki i kuchara di plèstik. I for di 1 di ougùstùs 2022 ta prohibí pa bende baki di kuminda di fom desechabel. Esaki ta nifiká ku bo no por kumpra e produktonan akí mas den supermarket i ku nan no ta ofresé bo esakinan mas tampoko na restorant, bar, hotèl òf otro empresa.

Yuda

EPB ta hasi un yamada riba siudadano pa duna un man pa tene e isla limpi. “Preferibel hasi uso di produkto reusabel. Bai ku por ehèmpel bo propio bòter di awa òf kùp pa bebe kos aden. Si tòg bo ta hasi uso di produktonan desechabel, e ora ei tira e desperdisio di plèstik separá afó i den e baki di shushi korekto”.

Pa yuda ku e konsientisashon mas aleu, dia 25 di mei lo por haña un tas reusabel grátis na diferente supermerkado, ora gasta mas ku $50.

Deel dit artikel
Rocargo
Rocargo
Rocargo
Rocargo