KRALENDIJK- Entidat Públiko Boneiru (EPB) ta hasi un apelashon riba siuidadano pa tuma medida kontra malesanan manera Dengue, Chikungunya i Zika den temporada di awaseru.  

Ku e kantidat di yobida den e delaster simannan i esei ta nifiká ku e chèns pa haña e malesanan di Dengue, Chikungunya i Zika ta oumentá. 

EPB ta splika ku un tipo di sangura, Aedes aegypty, yamá tambe sangura di Dengue, ta transmití Dengue, Chikungunya i Zika. E sangura akí ta biba spesialmente den kas i kurá di hende. E sangura muhé ta pika hende pa e por chupa sanger ku e mester pa alimentá webunan den su kurpa. Despues e ta buska opheto ku awa aden pa pone su webunan. E sangura di Dengue tin preferensia fuerte pa opheto artifisial ku banda lizu i awa kla. 

Segun EPB, e manera mas efikas pa prevení Dengue, Chikungunya i Zika ta eliminá tur lugá kaminda sangura por pone webu. E sangura ta pone su webunan den awa ku ta keda para, manera baki di plèstik, tayer di outo, bòter, bleki i hèmber den kua awaseru ta keda para. P’esei Departamentu di Salubridat Públiko ta hasi un yamada na tur hende pa regularmente kontrolá i deshasí di tur opheto ku por tin awa aden, den i rònt di kas. Bo tin baki òf barí pa kohe awaseru pa mata òf bestia? Sera esaki bon pa sangura. Esaki por, por ehèmpel ku un paña òf ku un skrin ku ta mara ku un faha di elastik rònt di e parti habrí.

Sirkulashon

Departamentu di Salubridat Públiko Boneiru ta informá sinembago ku na e momentu akí no tin señal ainda di sirkulashon di Dengue, Chikungunya òf Zika na Boneiru, pero esaki semper por kambia. 

Siudadanonan ku mester di konseho òf yudansa ku tratamentu di renbak òf barí di awa? Tuma kontakto ku Sekshon Kontròl di Vèktòr di Departamentu di Salubridat via 715-5324.