KRALENDIJK—E grupo di preshon Airport Tax Busters Bonaire (ATBB), den un komunikado djadumingu ta pidi  atenshon pa e problemátika rondò di e asina yamá Visitor Entry Tax (VET) ku Enitdat Públiko Boneiru (OLB) ta kobra bishitantenan no-residente ora nan drenta e isla. 

Segun ATBB, mientras ku e komunikashon original for di OLB tabata indiká un suma di 50 dòler komo impuesto un solo biaha pa aña, Konseho Insular di forma deskabayá a subi e suma aki na 75 dòler pa kada entrada, independientemente di kuantu biaha e pasahero yega boneiru. 

Di e forma aki un biahero ku ta bishitá e isla 10 biaha den un aña, ta paga awor un suma hopi eksagerá di 750 dòler soalamente na VET, hopi mas ku e impuesto anterior na Logeergastenbelasting i Carrrental Tax.  “Un bishitante ku ta tribi di sali for di Boneiru pa bai dal un buelta na islanan ruman Kòrsou òf Aruba durante nan estadia na Boneiru, bolbe mester paga e mesun 75 dòler ora ei yega bèk na Boneiru”, asina ATBB ta skibi.  

ATBB ta sigui mustra ku un famia di 4 persona, djies na e VET mester paga 300 dòler, kada bes ku nan ta pisa suela Boneriano.  E mesun kos taq sosodiendo ku bishitantenan for di otro islanan Karibense Hulandes, kaminda un impuesto proponé di 10 dòler pa aña a wòrdu reemplasá ku un impuesto di 10 dòler pa kada entrada. Segun ATBB loke ta e elemento mas pió aun ta ku un Boneiriano, nasí na Boneiru pero bibando den eksterior tambe mester paga 75 dòler pa kada biaha ku e ke drenta su isla natal. 

Imperfekshonan

E grupo di preshon ta mustra tambe riba e echo ku e Kolehio Ehekutivo anterior, ku tabata wòrdu formá pa MPB i UPB, na diferente okashon mes a rekonosé e defektonan den e impuesto nobo i a prepará kambio den esaki. “Komunikashon ofisial di parti di OLB riba 17 di novèmber 2022 ta menshoná ku e BC ta proponé kambionan den ehekushon di e VET. Dia 8 di desèmber 2022 sinembargo, OLB a anunsiá ku e Konseho Insular no a bai akuerdo ainda ku e kambionan proponé, ta sperando un evaluashon mas profundo”, asina ATBB ta skibi. 

Silensio

E grupo ta mustra tambe riba e echo ku, desde e último komunikashon for di OLB, no a komuniká apsolutamente nada mas tokante e kambionan deseá den e VET. “Esaki apesar di e echo ku BC mes a rekonosé públikamente ku e VET tin konsekuensianan indeseá. Interesante ta ku e Kolehio Ehekutivo ku a sinta, ta wòrdu formá pa e mesun dos partidonan di esun anterior, esta MPB i UPB ounke den un konstelashon algu diferente. Sinembargo, BC nobo te asina leu no a papia ètol tokante e VET, òf nan plan pa trese kambio den esaki”. 

ATBB ta bisa tambe ku den diskushonnan riba medionan sosial, pero tambe den konbersashonnan ku stakeholdernan importante, Kolegio Ehekutivo ta parse di skonde tras di Konseho Insular. “Nan ta indiká ku Kolegio Ehekutivo si ke implementá e kambionan, pero ku ta Konseho Insular no ta koperá.  Pa ATBB, e argunmentunan aki no ta konvinsente”.

E grupo ta mustra riba e echo ku ta e mesun koalishon di gobièrno, ku ta formá pa MPB i UPB, ta keda na mando, tantu promé ku despues di elekshonan. “Ta difísil pa kere ku 13 luna despues di introdushon di e VET ariba 1 di yüli 2022 i mas ku 7 luna despues di e promé esfuerso pa ajustá e VET, Gobierno di Boneiru no a logra bin ku e kambionan ku nan mes ta bisa di ta deseá”. 

Segun ATBB ta sigui bisa ku Gobièrnu pa medio di su komunikashon dia  22 di novèmber i dia 7 di desèmber 2022, a krea ekspektativa den esnan konserní, ku lo implementá kambio pa aliviá efektonan indeseá di e VET. |Keda sin kumpli ku ekspektitativa ku bo mes a krea komo Gobièrno, ta bai kontra di prinsipionan di Bon Gobernashon”, asina e grupo di preshon representá pa Harald Linkels, Lisandro Cicilia i Angelo Engehart ta klousurá. 

Linknan relevante:

https://bonairegov.com/nieuwsoverzicht/artikel/bestuurscollege-stelt-verbetering-visitor-entry-tax-voor

https://bonairegov.com/nieuwsoverzicht/artikel/eilandsraad-voert-verbeteringen-toeristenbelasting-nog-niet-door