Empresario

Gobièrnu di Boneiru ta renobá kontrato di kuido ku Kámara di Komersio

Sali di espera di Kámara di Komersio.

Kralendijk – Kolegio Ehekutivo di Entidat Públiko Boneiru a renobá e supsidio anual ku ta otorgá na e fundashon “Stichting Beheer Bedrijfsfondsen Bonaire (SBBB)” pa e aña 2021. E fundashon aki ta kai bou di Kámara di Komersio i Industria Boneiru, ku ta ehekutá e aktividatnan.

E supsidio ta wòrdu duná ku e meta pa stimulá negoshi nobo i sostené negoshi eksistente, spesialmente empresa chikí i mediano na Boneiru. Di e forma aki, gobièrnu di Boneiru i Kámara di Komersio (SBBB) ta traha huntu pa promové i fasilitá e sektor empresarial lokal.

Spesífiko

Ku e kontrato di kuido di aña 2021 a palabrá diferente aktividatnan spesífiko ku lo enfoká riba dje. Diputado Hennyson Thielman ta splika: “Nos ta hopi konsiente ku sektor empresarial di nos isla ta pasando den tempunan sumamente difísil. Den e aña di krísis aki, Kámara di Komersio ta ehersé un papel importante komo órgano kaminda empresanan por akudí pa informashon i guia krusial. Ku e supsidio aki, gobièrnu ta kolaborá ku Kámara di Komersio pa sigui yuda empresario pa medio di e lokèt di sosten, lantamentu di mas negoshi propio, eduká hóbennan pa bira empresario, i promové inovashon pa stimulá nos ekonomia.”

Komo parti di e akuerdo, lo traha huntu tambe riba realisashon di un foyeto di guia pa invershonista “Investment Guide”, un “business incubator” i mehorá prosesonan pa entre otro pèrmit pa empresa. E “business incubator” ta un lokalidat kaminda diferente empresa chikitu nobo i inovativo por hür un ofisina den mesun edifisio, ku e meta pa enkurashá interkambio i sinergia. Entre otro, lo duna sosten na e empresarionan ku treinen i “coaching”. Ta planeá pa start e “business incubator” den segundo mitar di 2021.

 Pa mas informashon tokante e servisionan i proyektonan aki di Kamara di Komersio, bishitá www.bonairechamber.com, meil bis@kvkbonaire.com òf yama 717-5595.

Deel dit artikel
Rocargo
Rocargo
Rocargo
Rocargo