Notisia

Gobièrnu di Kòrsou ta bai indeksá un parti di benefisionan 

WILLEMSTAD – Gobièrnu di Kòrsou  ta bai duna sosten èkstra na esnan mas vulnerabel den komunidat. Nos ta pensa entre otro riba hendenan grandi entre 60 i 65 aña ku tin solamente ònderstant, pensionadonan ku tin solamente penshun di behes di gobièrnu i hendenan ku un desabilidat.

Ta paga e sèn èkstra aki den luna di sèptèmber ku forsa retroaktivo te ku luna di mei 2022 i lo dura en prinsipio te dezèmber 2022.

E promé grupo ku ta bai probechá di esaki ta e grupo di 60 te 65 aña ku tin solamente entrada for di ònderstant. Nan ta haña seis porshento aserka ku ta masoménos binti florin pa luna. Ta trata di reimu 1800 persona.

Penshonadonan ku tin solamente penshun di behes i ta hañando kaba 130 florin èkstra pa luna, lo haña awor 25 florin mas aserka. 9.600 persona ta risibí penshun di behes di gobièrnu.

Hendenan ku un desabilidat ku mester biba di un ònderstant tambe ta haña un indeksashon di seis porshento, ku ta binti florin pa luna aserka.

E grupo total ku ta haña un ònderstant na Kòrsou ta alrededor di 7.500 hende. E kantidat ei ta bira mas chikí pasobra gobièrnu ta bai sanea e archivo. A resultá ku hendenan ku haña un trabou, no ta kita nan nòmber tur ora na ministerio di Desaroyo Sosial i Bienestar.

Deel dit artikel
Rocargo
Rocargo
Rocargo
Rocargo