Kralendijk- Gobièrnu di Boneiru ta kontentu ku e echo ku awor tin un kapasidat muchu mas grandi pa tèst hende pa Covid riba e isla mes.

E kapasidat adishonal ta danki na un akuerdo entre BonLab i e kompania hulandes, Hestia CSC. Hestia a trese vários aparato Boneiru, pero tin un aparato mas grandi ainda na kaminda. Djabièrnè último 4 aparato di tèst a yega Boneiru for di Hulanda. Ya for di djasabra 20 di mart a pone esakinan den uso. E 4 aparatonan huntu tin un kapasidat di 288 tèst pa kada 24 ora. A hasi pedido pa un di 5 aparato. Ta trata di un vershon mas grandi ku ta adekuá pa prosesamentu di maksimal 380 tèst pa dia aserka.

Rápido

Huntu ku e aparatonan a bini tambe un tékniko di laboratorio for di Hulanda ku tin eksperensia amplio ku e aparatonan nobo. El a entrená empleadonan di BonLab den kon pa traha korektamente ku e aparatonan. Ta trata di e asina yamá tèst di NAAT, un vershon rápido di e konosido tèst di PCR ku un resultado dentro di mei ora. Ku esaki, no ta nesesario mas pa manda tèst pa análisis na Kòrsou. Esaki ta nifiká ku resultado di tèst lo ta konosí muchu mas rápido ku ta e kaso awor.

Kontrolá brote

Gezaghèber Rijna ta hopi kontentu ku e kapasidat adishonal pa tèst na Boneiru mes. ‘Hasi hopi tèst ku un resultado rápido ta e manera mas efektivo pa logra haña e brote aktual bou di nos poblashon bou di kontròl.’

Segun direktor interino di BonLab Hose Booi, ku Hestia CSC e laboratori tin un partner profeshonal ku ta komprendé bon kiko nos mester na Boneiru.’

Turismo

Diputado Hennyson Thielman a mustra riba importansia pa turismo: ‘Banda di e interes di salubridat públiko e paso aki ta importante tambe pa turismo. Ampliashon di e kapasidat di tèst ta bon pa ámbos interes, tanten ku nos no a alkansá e grado optimal di bakunashon ainda.’ For di djadumingu biaheronan por laga tèst nan mes

---

Lesa tambe:

• 
  Preisnan di gasolin i disel ta baha entrante 24 di yanüari 
• 
  Echo ta organisá e di 20 konteo di Lora na Boneiru – Boluntarionan ta bonbiní 
• 
  Kódigo di Protekshon nobo ta duna sosten pa violensia doméstiko na Hulanda Karibense
• 
  A entregá chek na organisashonnan di beisbòl pa mucha
• 
  Pagabon Upgrade