KRALENDIJK- Kolegio Ehekutivo di Entidat Públiko Boneiru (EPB) ta aspirá pa introdusí algun mehorashon na e Visitor Entry Tax pa 1 di yüli benidero. E impuesto pa turista a keda un tema kontroversial for di su introdukshon kasi dos aña pasá. 

Ounke mayoria den e eilandsraad ta sostené e impuesto riba su mes, den práktika, e tin sierto efekto indeseá tambe. Ounke e gobièrno di MPB/UPB ku  keda di introdusí e ahustonan deseá, nan no a kumpli ku esaki, promé ku nan a wòrdu mandá kas òktober 2023.  

Diputado di Finansa Clark Abraham ta spera ku e eilandsraad lo aprobá tres kambio riba término korto na e sistema aktual, durante un reunion di tuma desishon di 11 di yüni venidero. E promé kambio ta e tarifa redusí di $10 pa tur Boneriano ku no ta residente di Boneiru. E tarifa redusí ya tabata apliká pa bishitante residente di otro isla Antiyano, pero no pa e Bonerianonan ku ta biba na Hulanda òf otro lugá mas leu. 

E di dos kambio ta regardá abolishon di e impuesto pa studiante di Boneiru ku ta biba den eksterior pa motibu di nan estudio. E tarifa pa nan lo keda redusí te na zero.

E di tres kambio ta un prolongashon pa un luna pa e balides di e kódigo QR ku bishitantenan ta risibí despues di paga e impuesto. Esaki ta permití bishitante di hasi bishita kòrtiku na e islanan besino sin ku mester paga e montante kompletu di $75 otro atrobe, ora nan bolbe drenta Boneiru.

Temporal

Durante e presentashon di e proposishonnan djamars den Koseho Insular, Abraham a indiká ku kambionan proponé ta kambio temporal. “Esaki ta pa aliviá e puntonan di dolor den e areglo aktual. Tin otro kambio ku ta deseabel, pero mester di mas tempu mester pa por traha riba nan”, asina Abraham a splika. 

Kolegio Ehekutivo ta preferá pa kambia e areglo aktual pa unu k uta completamente nobo. Sin embargo, preparashon di un lei completamente nobo, lo tuma mas tempu pa prepará.