Gobièrnunan ta bai supsidiá fèri entre islanan na Islariba

Oranjestad/The Bottom- E kompania di fèri Blues & Blues lo bai proveé konekshon marítimo entre St. Maarten, St. Eustatius, Saba i St. Kitts.

E kompania, prosedente di Anguilla, a wòrdu skohé entre e 7 kompetidó ku a manda un oferta aden pa e servisio aki. Awor ku a kaba di selektá e provedó di servisio lo bai traha riba un asina yamá Public Service Obligation (PSO), kaminda ku gobièrnu ta duna un subsidio na e operadó di e rutanan aki.

Di nan banda e kompania tin ku kumpli ku un sierto frekuensia i ehekushon di e servisionan manera ela primintí den e proseso di manda oferta. Gobièrnu ta bai duna un supsidio total di 2 mion di euro (masomenos 2.3 mion di dòler).

Kontentu

E gobièrnunan di St. Eustatius i Saba a mustra nan mes kontentu ku e interes pa ehekutá e ret di komunikashon marítimo entre e islanan.

Di otro banda, hopi residente riba e islanan ta opiná ku servisio via di fèri no ta komparabel ku esun di avion, spesialmente si mester biaha bai mas aleu. Buelonan di konekshon, spesialmente pa habitante di Saba i St. Eustatius, ta sali for di aeropuerto di St. Maarten i un kombinashon di boto di un banda, pa sigui despues ku avion no ta esun mas ideal.