Kralendijk – Kresementu i desaroyo mundial riba tereno finansiero, i huntu ku esaki tambe desaroyo den kriminalidat finansiero, ta pidi desaroyo di konosementu i mas kolaborashon den e retnan riba tereno di Kriminalidat Finansiero Ekonómiko (Financieel Economische Criminaliteit, FINEC). Kuerpo Polisial Hulanda Karibense, den kolaborashon ku Inter-Continental University of the Caribbean, ku sosten finansiero di Ministerio Públiko, a desaroyá i realisá un kurso di 3 aña pa tur partner den siñalamentu i bataya kontra kriminalidat finansiero. Aruba, Kòrsou i Sint Maarten tambe ta partisipá na e kurso.

E kolegio di hefenan di Kuerpo a palabra pa brasa i sostené e inisiativa aki e aña nan benidero. Koleganan polisial i partnernan por sigui e kurso aki ku Prof. Drs. Wagner i Prof. Dr. Cijntje ta duna. E 3 añanan benidero lo duna e kurso aki riba kada pais ku e meta pa forma un ret amplio kontra e forma di kriminalidat aki i pa stimulá desaroyo di konosementu i kolaborashon entre partnernan.

Kuerpo Polisial Hulanda Karibense tambe a lanta un unidat di FINEC separá ku ‘taakaccenthouders’ i ta spera di fortalesé reshèrshi finansiero i hasi Hulanda Karibense mas seif dor di e desaroyo aki. Despues di e start na Aruba, Hulanda Karibense tabata na turno e simannan tras di lomba. Tabatin hopi partisipante i nan satisfakshon tabata grandi. Esaki tabata un paso importante i pues otro aña lo inisiá e kurso aki di nobo.

---

Lesa tambe:

• 
  Por deskubrí historia di antepasadonan ku e buki ‘Archivo Spièrtá’
• 
  ZJCN ta introdusí mehorashon den seguro médiko pa islanan BES 
• 
  Marco van de Kreeke bèk na aeropuerto Flamingo komo di dos direktor 
• 
  Otro charla mas pa mayornan tokante uso seif di medionan sosial serka mucha
• 
  Entrega di Kalènder 2025 “Ban Topa Nos Grandinan” na Gezaghèber John Soliano