Gran majoria di buelo na BIA ta prosedente for di Kòrsou

Kralendijk- Apesar di e hecho ku nan no ta trese e mayoria di pasahero pa Boneiru, e gran mayoria di buelo ku ta baha na aeropuerto Flamingo, ta keda prosedente di Kòrsou.

Esaki ta sali na kla di un presentashon di e direktor operashonal di BIA, Onno de Jong. Pa loke ta traha e aña aki, te ku siman pasá un kantidat di 1922 buelo prosedenti di Kòrsou, siguí pa 332 buelo for di Amsterdam i 193 buelo for di Aruba.

For di Atlanta i Miami a risibí 25 buelo kada un te ku siman pasá. Aki mester tuma na kuenta ku te mei mei di aña, aerolíneanan di Merka no tabata outorisá pa baha na Boneiru ainda.

Avion chikí

E gran kantidat di buelo entre Kòrsou i Boneiru ta prinsipalmente debí na e echo ku ámbos Divi Divi ku EZ Air ta bulando pa Boneiru ku avionnan relativamente chikí. Esaki lo kambia ora EZ Air kuminsá usa su avion Saab340 mas grandi riba e ruta. E avionnan aki ta karga 34 pasahero, ku ta dòbel di e kantidat ku avionnan eksistente di Divi Divi ku EZ ta usa, i kasi tres biaha mas tantu ku e avion mas chikí Britten Norman Islander ku ta karga solamente 8 a 9 pashero.