KRALENDIJK – Representantenan di Greenpeace a papia ayera ku sekretario di estado Alexandra van Huffelen di Asuntunan di Reino tokante kambio di klima. Motibu pa esaki ta e rapòrt di investigashon di Vrije Universiteit tokante kambio di klima i Boneiru, ku a publiká e fin di aña aki riba petishon di Greenpeace Hulanda.

Riba e ministerio di Asuntunan di Interior na Den Haag Greenpeace a asentuá ku gobièrnu Hulandes mester asumí su responsabilidat i mester protehá Boneiru, Saba i Sint Eustatius kontra e konsekuensianan serio di kambio di klima.

Huntu ku habitantenan

“Pa kombatí kambio di klima mester baha e emishon mundialmente, pues tambe na Hulanda. I pa protehá Boneiru i e otro islanan kontra e konsekuensianan di kalentamentu, gobièrnu, huntu ku e habitantenan, mester drenta den akshon rápido”, Faiza Oulahsen, hefe di Klima i Energia na Greenpeace ta bisa.

“E sekretario di estado a skucha nos preukupashonnan, pero awor ta trata di medidanan konkreto. Pa forsa esei nos ta prepará huntu ku  personanan na Boneiru un kaso den korte kontra estado Hulandes.”

Pa loke ta trata e Mesa di Klima ku ta bai instituí pa Boneiru Greenpeace a informá e sekretario di estado ku ta esensial pa embolbí e habitantenan di e isla den esaki.

Dokumentunan di gobièrnu 

Tambe Greenpeace a risibí e siman aki e promé dokumentunan despues ku Greenpeace a entregá un petishon di WOO (Wet Open Overheid) na Ministerio di Asuntunan Interior i Relashonnan di Reino.

Greenpeace a pidi e ministerio for di yüli 2022 pa publiká tur dokumentu ku ta papia di kambio di klima, adaptashon di klima (medidanan pa mitigá e konsekuensianan di kambio di klima) i siguridat di awa riba e islanan BES.