Notisia

Grupo di trabou ta bai atendé ku problemátika kresiente di kachó na Boneiru

KRALENDIJK- Un grupo di trabou miksto ta bai atendé ku e problema di kachónan agresivo k uta kana lòs riba kaminda i ya a ataká varios hende. 

“Pa basta tempu kaba molèster di kachó ku ta kana lòs i e kantidat di insidente ku mordementu ta forma un problema grandi. Aunke ku den e ordenansa di kachó a inkluí ku e doño di kachó tin e obligashon pa tene un kachó den su propio kurá, den práktika regularmente ta resultá ku esaki ta otro”, asina Entidat Públiko Boneiru (EPB) a skibi en un komunikado djaweps atardi. 

EPB ta mustra riba e echo ku un ordenansa so no ta sufisiente i e problemátika rònt di komportashon di kachó ku ta kana lòs ta hopi mas kompliká i pa e motibu akí esaki ta pidi pa un aserkamentu integral amplio.  

Komo guia lo usa e Plan di Aserkamentu Bienestar di Bestia 2021 – 2025. A realisá e plan akí despues di konsulta ku e organisashonnan di yudansa pa bestia ku ta presente na nos isla, e dòkternan di bestia i e entrenadó di kachó. E promé komienso t’ei, awor mester konbertí maneho den ehekushon. 

Komposishon

Pa e motibu akí riba inisiativa di Entidat Públiko Boneiru a krea un grupo di trabou den kua empleadonan di Supervishon i Mantenshon di Lei, Ofisina di diputado Thielman, Gabinete di Gezaghèber, Kuerpo Polisial Hulanda Karibense, Ministerio Públiko i departamento di komunikashon ta partisipá. E grupo di trabou tin komo tarea pa konbertí e Plan di Aserkamentu den un agènda di ehekushon, kaminda ku diferente punto ta para sentral. 

Gobièrnu ta mustra ku banda di mantenshon di lei, mester pone hopi atenshon riba kuido i edukashon. “Esakinan ta hunga un ròl grandi den komportashon di kachó i e responsabilidat pa esaki ta keda serka e doño di kachó”, asina EPB ta skibi. 

Wufi

Bandi di e trabou di e grupo di trabou, lo kuminsá ku un kampaña di informashon. E campaña, ku mester sostená e trabounan di e grupo di trabou, ta haña sostén di un maskota ku a boutisá Wufi i e lema: ‘Bo kachó, bo responsabilidat’. Wufi a keda inspirá pa un kachó real, ku a keda maltratá. Awor ya Wufi tin un bon bida serka un famia nobo. 

Entidat Públiko Boneiru, huntu ku e partnernan enbolbí, ke limitá molèster di kachó i no ta bai hasi esaki solamente pa medio di mantenshon di lei, pero netamente pa medio di prevenshon via dunamentu di informashon, oumento di konsientisashon i sosten konkreto di doñonan di kachó. Lo komuniká e akshonnan for di e agènda di ehekushon na un manera amplio. 

Deel dit artikel
Rocargo
Rocargo
Rocargo
Rocargo