Kuido i salú

Grupo di trabou ta insistí pa un ‘trayekto di rehabilitashon’ pa hòspital na Boneiru

Rosemarie Winklaar ta spera ku por konvensé Fundashon Mariadal pa tene Neurólogo Richard Beukers na trabou

KRALENDIJK – E grupo di akshon, ku a komprometé su mes pa krea un akson di firma pa mantené e neurólogo popular Richard Beukers  riba e isla, ta pidi pa loke nan ta deskribí komo un ‘trayekto di rehabilitashon’ dentro di e organisashon di hòspital.

Na tur 1981 siudadano a pone nan firma bou di e petishon pa mantené Beukers i su kasá, ku ta den servisio na Fundashon Mariadal komo onkólogo. Den e karta fechá 14 di mei e suskritonan Rose-Marie Winklaar, Lisandra Seraus i Priscilla Raes ta trese dilanti ku kasi 10 porshento di henter poblashon a firma e petishon.

Sinembargo fuera di e pèrdida menasante di Beukers e outornan di e karta ta mira hopi mas kos ku ta bai robes dentro di e Fundashon. “E kredibilidat di Fundashon Mariadal a drenta den un spiral ku ta bai abou. Esei ta den desakuerdo ku e meta statutario di e fundashon menshoná anterior. E fundashon ta sufri di daño di reputashon! E situashon aktual ta pidi un mehorashon efisiente sin mas posponementu!”

E outornan di e karta ta hasi menshon tambe di loke nan ta deskribí komo kultura di miedu dentro di e hòspital i un estilo di liderato outoritario di e direktor médiko di Mariadal. “Esaki tin komo konsekuensia ku e ambiente di trabou di henter personal, e dòkter- i spesialistanan den Fundashon Mariadal a bira malu, e kondishonnan laboral a empeorá i a okashoná un kultura di miedu interno. Esei ta traha den direkshon kontrali, no ta produktivo i ta parse nos inakseptabel”.

Trayekto di rehabilitashon  

E outornan di karta ta keda insistí tambe riba loke nan ta deskribí komo un ‘trayekto di rehabilitashon’ kaminda, si ta nesesario ta traha bou di liderato di un mediadó pa drecha e situashon dentro di e hòspital. E firmantenan ta bisa tambe ku nan ta di opinion ku un tal trayekto ta indispensabel pa un restablesimentu di konfiansa den e organisashon di e hòspital.

A manda kopia tambe di e karta, ku ta dirigí na gerente di Mariadal, pa sekretarionan di estado Van Ooijen i Van Huffelen, gezaghebber interino Oleana, diputado Nina den Heyer i miembronan di konseho insular.

Deel dit artikel
Rocargo
Rocargo
Rocargo
Rocargo