Habitantenan di Bonaire fadá ku tetementu pa establesé Mínimo Sosial

KRALENDIJK – Mirando na e grado di partiipashon durante un marcha di protesta djabièrnè, por bisa ku habitantenan na e isla di Boneiru ta hopi malkontentu ku e tardansa den fihamentu di un asina yamá Mínimo sosial pa e suksesivo gabinetenan na Hulanda.

Diestres aña despues di a alkansá e status di Entidat Públiko den teritorio Hulandes, ahinda no a kaba di establesé e montante ku ta representá un entrada minimo realístiko pa hiba un nivel di bida akseptabel na Boneiru. 

Kontrali na protestanan anterior, e biaha aks si e akshon di protesta a risibí un apoyo bastante masivo. USIBO, kupel di sindikatonan na Boneiru, a hunga un papel importante den organisashon di e protesta, pero nan a risibí apoyo di hopi otro grupo, manera partidonan polítiko, prensa, i organisashon di konsumidó Unkobon. 

Aimed Ayubi, di  Live99FM, ta bisa ku el a konta entre 2500 i 3000 partisipante den e akshon aki. 

Amplio

E protesta  di djabièrnè ta konta ku hopi sosten den populashon. Esaki por a ripará na e echo ku tur partidonan polítiko, tantu esnan ku ta den gobernashon komo esnan den oposishon, a hasi un apleashon riba habitantenan pa partisipá na e protesta. Tambe por a nota ku e biaha aki kasi tur grupo étniko riba e isla a partisipá aktivamente den e marsa di protesta.

Organisadónan di e marsa, manera lidernan sindikal Norwin Willem i Ewald Abdul, a bisa djabièrnè anochi di ta sinti nan mes orguyo pa e manero digno i pasífiko ku e protestanan a tuma lugá. “Nos tur ta demostrá ku awor aki si nos kana a yega. Pero apesar di e indignashon fuerte, e manifestantenan a komportá nan mes na mil maravia,” Willem a bisa.