Habitantenan di Boneiru ta keha spesialmente di Entidad Públiko Boneiru (OLB) serka defensor di pueblo

KRALENDIJK – Mayoria keho ku ta bini dilanti serka defensor di pueblo nashonal ta trata di Entidat Públiko Boneiru, OLB. Esei e sitio wèb di defensor di pueblo na Hulanda ta informá.

Hopi di e kehonan ta menshoná ku hopi biaha no ta kontestá petishon- i preguntanan ku ta hasi na OLB. Esaki a kondusí na un sintimentu  general di malkontentu.

Banda di kehonan riba OLB, tin tambe keho i pregunta dirigí na Kuerpo di Polis di Karibe Hulandes, Servisio di Imigrashon i Naturalisashon i Banko di Seguro Sosial, SVB.

“Nos a risibí señalnan di e situashon preukupante di hendenan di edat riba e isla. Pensa riba pobresa i un falta di fasilidat disponibel. Tambe algun hende di edat a duna e señal ku nan no ta disponé di un adrès di imeil òf un lèptòp, di moda ku ta difísil pa nan komuniká ku instansianan.”

Tambe a enfatisá ku regularidat e nesesidat di un lokèt hurídiko aksesibel pa habitantenan, segun e defensor di pueblo.

Kordinadó Gaby von Maltzahn: “Mi ta kontentu ku mas i mas hende ta akudí serka nos. I ounke e kòmbersashonnan hopi biaha ta trata tópikonan difísil i di peso, e habitante ta resistente si.”