KRALENDIJK – Arubianonan bibá na Boneiru a tene un konmemorashon riba 25 di yanuari na okashon di a optené status aparte di Aruba na 1986. Nan a bini huntu na e monumento di Gilberto Francois Croes na e Plaza Brion nobo ku un fondo Arubano pa konmemorá e momento históriko aki.

Na Aruba e polítiko Gilberto Francois (Betico) Croes tabata un di e inisiadónan pa haña status aparte pa e isla. Lástimamente Betico Croes a muri un aña promé ku esaki a bira realidat a konsekuensia di un aksidente serio di outo. Esaki a pone ku Betico Croes no por a bira e promé promé minister di Aruba. Henny Eman a bira e promé promé minister di Aruba. 

Wolter de Palm ku ta presidente di e asosiashon Arubiano na Boneiru, ta bisa lo siguiente: “Na 1985 Aruba tabata forma parti di Antia Hulandes. Segun Betico Croes Aruba no tabata haña tur su derechonan na e momento ei. E tabata ke pa e isla haña e rekonosimento di status aparte. I el a logra esaki. Lasimamente e anterior polítiko a muri na  momento ku e lo a bira e promé promé minister”.

Libertador di Aruba

Ainda ta mira Croes komo un defensor importante pa a saka e isla  for di Antia Hulandes. Tur aña e pueblo Arubiano ta para ketu na e momento históriko aki riba 25 di yanuari, ku ta e fecha natal di Betico Croes. Ta mira e anterior polítiko ainda komo e libertador di Aruba i na Boneiru ta selebrá esaki.

De Palm ta splika: ,,Tin hopi Arubiano ta biba na Boneiru. Nos klup tin alrededor di 55 miembro. Tur aña nos ta bini huntu riba e fecha aki. Na Aruba e ta un fiesta nashonal. Na Boneiru esei no ta e kaso. Sinembargo nos ta bini huntu akinan. Nos ta kanta himno di Aruba na e monumento aki. Nos ta hisa bandera i dal un bríndis huntu”.