WILLEMSTAD – Recherche Samenwerkingsteam, polis di Kòrsou i duana den koperashon huntu a detené ayera J.J.J. di 45 aña riba tereno di haf di Schottegat. Ta sospechá J.J.J. di partisipashon den trafikashon di droga den su funshon komo bewaker.

Despues di su aresto a hasi entrada na kas di J.J.J. bou di guia di un wes komisario. No a duna detaye ainda di loke a haña durante e entrada aki.

J.J.J. no ta e promé bewaker di haf aki ku a detené den konekshon ku e kaso aki. Siman pasá a detené R.J.R di 50 aña, ku tambe tabata traha komo bewaker riba e tereno di haf. R.J.R. ta keda detené pa su presunto partisipashon.

Ministerio Públiko, ku a duna òrden pa e detenshon aki, a duna di konosé ku mas detenshon por sigui. E detenshonnan aki ta forma parti di un investigashon di tráfiko di droga mas grandi riba tereno di haf di Schottegat.