WILLEMSTAD – Kiko ta sosodé ora Hip Hop topa Tambú? Artista Juersson Hermanus a presentá su presentashon Yu di Kòrsou den Museo di Tambú Shon Ciola djadumingu 15 di yanüari último.

‘Yu di Kòrsou’ ta un presentashon di baile, kaminda Hermanus ta bai en buska di e loke ku e mester pa pone un relashon entre su raisnan i su entidat komo persona i bailarin.

Komo promotor e ta dirigí su mes riba su raisnan Kurasoleño i ta kuminsá su investigashon ku e enfoke riba tambú, un parti di su identidat Kurasoleño i Boneriano, ku e ta inkorporá den su fondo di hiphop.

E tambú di Kòrsou ta originá den siglo djesshete i djesocho for di diferente estilo di músika, baile i ritualnan di Wèst di Afrika. E Afrikanonan ku nan a hasi katibu i ku a hiba Merka a bini ku nan.

E meskla di influensianan Afrikano ta kambia ku tempu i ta adaptá su mes na e sirkumstansianan lokal. Ta keda rekonosé klaramente e elementonan Afrikano manera ripitishon, ritmo, sierto instrumento di perkushon i improvisashon den e tambú di Kòrsou.

Durante su buskeda e ta deskubrí kuantu similaridat tin entre su identidat i Afrika i Tambú i Hiphop. Tambe e ta hiba kòmbersashonnan konfliktivo ku su famia i ku komunidat. Ku e deskubrimentunan di su investigashon e ta puntra su mes kon  e ta skohe ken e ke ta?

E Museo di Tambu ta situá na Kaya Sabana Baka number 31.