KRALENDIJK – Djaluna anochi algu promé ku 7or di anochi meldkamer sentral a risibí notifikashon di un persona ku mester a bira malu riba waf flotante dilanti di Parke Tului. 

Na promé instante personal di ambulans i polis no por a yega na e persona pa motibu ku e waf ta será pa motibu di kondishon di wer. 

Al final personal di ambulans a logra subi e waf i a kuminsa reanimashon. Algun momentu despues a transporta e víktima pa hòspital pa kontinua e reanimashon pero esaki tabata en bano. Despues di un investigashon di departamentu forénsiko di KPCN, dòkter a konstatá morto natural di e hòmber di inisial E.G.D.C. di 26 aña di edat. 

E morto di E.G.D.C. ku tabata hopi kerí den komunidat a kousa un shòk basta grandi djaluna anochi, ku hopi hende ku no por a kere e notisia. 

No subi waf

Ounke ku ainda no ta kompletamente kla kiko eksaktamente a tuma lugá, KPCN mientrastantu ta hasi un apelashon pa no subi riba e waf mientras esaki ta será.