Hòmber ta muri na Blue Bay despues di kaida ku frishidèr 

WILLEMSTAD – Na Blue Bay un hòmber a bin fayesé ayera despues di un aksidente fatal. Polis a bin topa un hòmber drumi den un plas di sanger i gravemente heridá.

For di investigashon preliminar a bin sali na kla ku e hòmber tabata baha di e parti mas ariba di e kas ku un frishidèr. Na momentu ku e tabata baha e trapi, el a kai di un haltura i a keda seriamente heridá. Supuestamente e frishidèr a kai riba e hòmber.

Personal di ambulans ku a yega na e sitio, no por a hasi nada mas pa e víktima i dòkter di polis a konstatá su morto.

Teniendo na kuenta ku famia no a identifiká e víktima ainda, no por duna nòmber di e víktima ainda.