Hopi apresio pa liderazgo di gezaghèber interino Nolly Oleana durante krisis di wer

KRALENDIJK- Den transkurso di djaweps por a skucha na hopi kaminda na Boneiru un apresio grandi pa e trabounan di gezaghèber interino Nolly Oleana, pa loke ta trata e manera ku ela guia e isla durante e menasa di mal tempu djamars i djarason. 

Tino de Palm, personalidat di media Boneriano, a ekspresá esaki hopi kla riba su Feisbuk personal djaweps mainta. “Apresio enorme pa Gezaghebber Nolly Oleana pa e manera ku el a dirigí henter e operashon durante e último dianan preparando pa un posibel mal tempu. Trempan òf nò, traha espasio na tur momentu pa hèndel e asuntu, ta disponibel henter dia pa duna informashon tokante e situashon sin eksepshon”, asina De Palm a skibi.

Hopi hende tabata di akuerdo i a pone nan propio opservashon tokante e manera ku Oleana a tuma e tarea riba dje, mientras ku gezaghèber i hinter kolegio ehekutivo tabata na Hulanda pa partisipá na kongreso di Verniging van Nederlandse Gemeenten (VNG). 

Idioma

Tòg aki aya por a skucha algun krítika tambe en espesial di hende ku no ta komprondé papiamentu. Por a skucha ku den kasonan di krisis, manera esun di e siman aki, gobièrnu òf gezaghèbert lo mester perkurá tambe pa komunika a lo ménos tambe na Ingles òf Hulandes. No tur hende tabata di akuerdo ku e komentarionan aki.