KRALENDIJK – Esnan ku a sali hasi kompras na Boneiru djasabra por a nota ku na supermerkadonan tabata tin reinan imensamente largu, i alabes hopi rèki bashí. Tur aña, ta manera un kore-kore pa por keda kla pa hasi kompras den e dia liber di bièrnè Santu i e promé dia di Pasku.  

Hopi kumpradónan no ta komprondiendo dikon no ta kambia regla ku pakusnan inkluyendo supermerkadonan mester sera di forma obligatorio ámbos Bièrnè Santu ku Promé dia di Pasku. 

No solamente e kantidat di habitantenan den e añanan tras di lomba a krese fuertemente, pero tambe tin mas i mas turista ku ta hasiendo kompras di e supermerkadonan lokal. 

Riba Medionan Sosial por a lesa bastante kiko di hende ku a sali kompras i ku a gasta mas ku dos ora pa kaba di hasi esaki. E echo ku hopi biaha na Boneiru mester pasa na mas ku un supermerkado pa por haña tur kos ku un hende mester. 

Seramentu obligatorio

Na Boneiru, tin kuater dia pa aña kaminda tur tienda, inkluso e supermerkadonan ku mester sera pa lei. Banda di Bièrnè Santu i promé dia di Pasku, esakinan ta promé dia di Pasku i promé di yanüari di kada aña. 

Den e último añanan, tin dispensensashon pa tiendanan ku ta bende produktonan turístiko ora tin barku krusero den haf. Sinembargo e definishon di kiko ta kai bou di ‘produkto turístiko’ no tur ora ta masha kla.