KRALENDIJK – Hòspital di Boneiru ke bai eksplotá su propio servisio di ambulans komo parti di un departamentu integrá Acute Care na Fundashon Maria Dal, manera ta nòmber di e hòspital na Kralendijk.

E servisio di ambulans aéreo ku e hòspital ke lanta mester bai sirbi e islanan Hulanda Karibense, entre nan Aruba, Boneiru, Kòrsou, Saba, Sint Eustatius i Sint Maarten. Pero tambe lo transportá pashèntnan pa otro destinashon manera Colombia, Panama, Martinique, Guadeloupe i/òf  Miami na momentu ku ta nesesario.

Servisio di helikòpter di trouma 

Desde 2012 Fundashon Mariadal ta eksplotá un servisio di helikòpter di trouma, kaminda ta hasi uso di servisionan di un kompania di aviashon eksterno.

Di 2013 te ku fin di 2019 a bula mas ku 1200 mishon, ku ta alrededor di 160 pa aña. Di e mishonnan aki 45 porshento tabatin komo destinashon Colombia, mientras e 55 porshento di buelonan sobrá tabata entre e otro islanan den e area Hulandes Karibense. 

Di e buelonan aki 26,5 porshento tabata ku pashèntnan (ventilá) hopi kompliká. E otro buelonan tabata stabil.

Oferta 

Hòspital di Boneiru ta invitá awor kompanianan di aviashon pa reakshoná riba un petishon pa duna informashon pa establesé  i eksplotá un servisio di ambulans aéreo  den un posibel sosiedat.

E trayekto di oferta mester duna un idea di situashonnan di merkado i viabilidat di tal servisio eksklusivo di ambulans aéreo. Na final esei mester start un prosedimentu di subasta.

E sosio mester tin konosemtu i eksperensia ámplio di operashonnan aéreo, mientras e hòspital lo trese su konosementu i eksperensia ámplio di aspektonan médiko pa ku e operashon  den e asosiashon. E meta ta ku ámbos partido ta koperá huntu pa garantisá disponibilidat 24/7  i realisá seguridat, kalidat i kontinuidat  óptimal di e servisio di helikòpter di trouma.

E hòspital ke establesé i eksplotá e servisio di ambulans aéreo nobo ku un sosio, den un empresa operativo nobo, ku propio sertifikashon i akreditashon. E hòspital lo ta akshonista mayó ku un mínimo di 51 porshento di e akshonnan.