Kralendijk- Fundashon Mariadal a amplia e kantidat di kama di ‘Special Care’ pa por atendé ku tur e pashèntnan di Covid. Banda di esei e ‘air ambulance’ ta transportá pashèntnan di Covid entre e otro hòspitalnan den parti karibense di Reino.

Mariadal a ekipá sekshonnan apart di Covid den e departamentunan di ‘Special Care’ i ‘Sentebibu’ (departamentu di kuido). Temporalmente klientenan di Kas di Kuido ta haña akohida den e hotèl di kuido Delfins, di manera ku ta surgi espasio pa kuido ku no ta destiná pa Covid.

Dependiente di e kantidat di kama ku ta disponibel e ‘air ambulance’ ta sòru pa transporte di pashèntnan di Covid entre e hòspitalnan den parti karibense di Reino. E ‘air ambulance’ a trese un pashènt di Boneiru, ku anteriormente a keda transportá pa Kòrsou, bèk Boneiru.

Colombia

Pa motibu di e oumento grandi di pashènt di Covid na Kòrsou, si ta nesesario Mariadal ta manda pashènt di Covid Colombia. Mariadal tin un kolaborashon duradero ku e hòspitalnan na e pais aki. Si ta manda un pashènt Colombia ta dependé entre otro di faktornan médiko i e kapasidat di kuido disponibel na e islanan. Na e momentunan aki no ta nesesario pa manda pashènt Colombia.