Hulanda i Aruba ta organisá Konferensia di Klima na Aruba

DEN HAAG – Islanan chikitu, manera na Hulanda Karibense, ta èkstra vulnerabel pa kambio di klima i ya kaba ta nota e efektonan negativo. Hulanda i Aruba kier promové koperashon riba tereno di akshon klimatológiko entre e islanan chikitu rònt mundu. 

Di 10 te ku 12 di mei nan ta organisá e promé Konferensia Karibense di Klima i Energia (Caribbean Climate & Energy Conference) (CCEC) na Aruba.

Hulanda i Aruba kier pa e islanan den e área karibense bira un ehèmpel di e aserkamentu klimatológiko riba e paisnan insular chikitu. Riba invitashon di promé minister di Aruba, Evelyn Wever-Croes, i minister pa Klima i Energia, Rob Jetten, representantenan di pais- i organisashonnan ta reuní na Aruba. Ta trata aki di representantenan di islanan di region karibense mes, pero tambe di partidonan relevante pafó di nan, manera paisnan insular den Oséano Pasífiko, organisashonnan di Nashonnan Uní, institutonan di konosementu i institutonan finansiero. 

E promé dia di e konferensia ta dediká na transishon di klima i energia den Reino hulandes. E islanan karibense di Reino lo diskutí ki koperashon tin mester pa logra e metanan klimatológiko di Paris. E di dos dia di e konferensia tin un enfoke internashonal; e ora ei un pènel amplio di e isla- i organisashonnan ta bai diskutí ku otro tokante e akshon klimatológiko ku tin mester pa islanan rònt mundu. Riba e di tres dia e partisipantenan lo bishitá proyektonan di energia na Aruba i lo papia ku hóbennan tokante klima i transishon di energia riba e isla. 

Aselerá

Durante e kumbre na Sharm-el-Sheikh (COP27) Hulanda a tuma akshon pa aselerá transishon di klima i energia na paisnan insular chikitu, manera den e parti karibense di Reino. Pa e meta akí Hulanda a afiliá na inisiativanan manera ‘Local2030 Islands Network’ i ‘SIDS Lighthouse Initiative’. Ku e Konferensia di Klima i Energia Karibense‘ na Aruba, gabinete kier sigui traha riba esaki.