KRALENDIJK – Humphrey Jr. Wout mihó konosí komo Junny Wout ta djòin MPB i ta kanando e trayekto di preparashon pa subi lista i partisipá na elekshon di Konseho Insular 15 di mart 2023. Junny ta un persona nasé na Rincon ku despues di su estudio eskolar a traha den sektor atministrativo i despues servisio di duana.

E ta motivá su desishon manera ta sigui: “Mi ta un persona ku semper ta trata di ‘transformá tragedia den triunfo’. Mi ta kere firme ku e kaminda di bida di tur dia den tur su fasetanan por trese felisidat pa nos. No solamente e destinashon.”

“Mi a djòin polítika dor ku mi no ke para na banda kritiká pero mi ke yuda positivamente den desaroyo di mi isla Bonaire. Mi a nase i a lanta den un famia sindikal i polítiko. Mi papa Humphrey Servandus Wout tabata respektivamente diputado, miembro di Konseho Insular i miembro di Staten di Antia den dékada ochenta. Promé ku esei e tabata embolbí den sindikalismo. E tabata presidente di AFBW.”

Hóben

“Mi ta kere ku a bira tempu pa hóbennan ku idea i energia nobo duna nan aporte en grande pa yuda konstruí nos mes futuro i futuro di nos yunan. Ku mil amor mi ke pone mi skouder bou di e desaroyo ku a inisiá pa engrandesé Bonaire. Mi a skohe pa partido MPB paso mi ta mira e forma moderno, transparente i organisá di hiba polítika ku por sigui duna bienestar na pueblo di Bonaire.”

“Huntu ku MPB mi ta mira posibilidat grandi pa logra mi deseonan pa Bonaire ku ta un desaroyo ku ta kuadra ku nos prinsipionan i nos kultura, un desaroyo optimal di nos potensialnan i un desaroyo moderno ku ta kumpli ku nesesidatnan di tur ku ta biba na Bonaire pa asina por reina felisidat serka tur famia.”