WILLEMSTAD – Hushang Ansary a bai korte di apelashon kontra e sentensia den huisio sumario kaminda wes a disidí den òktober ku no ta e, sino Kompania di seguro Ennia ta doño di SunResorts i, pa ampliashon, di Mullet Bay na Sint Maarten. Esei Antilliaans Dagblad ta informá.

E multimionario Merikano di 94 aña di desendensia Irani ta net na tempu pa apelá. Wes mester fiha un fecha pa tratamentu. Segun e korant esei lo ta den febrüari. E sentensia ta di importansia pa e miles di aseguradonan di Ennia, pasobra e fondo di pensiun tin muchu tiki kapital pa por paga penshun riba término largu.

Esei ta e konsekuensia direkto di salidanan na gran eskala di kapital di e akshonista prinsipal Ansary i dos ko-akshonista. Na 2021 a kondená nan, den korte di promé instante, pa un daño di mas ku un miar florin. E kaso aki ta bai den apelashon den luna di mart.