Impuesto nobo pa turista definitivamente lo drenta na vigor 1 di yüli 

KRALENDIJK – Según un komunikado di prensa ku a saka den transkurso di djaweps, gobièrnu di Boneiru ta enfatisá ku e Tourism Entry Tax, o sea e impuesto pa drenta Boneiru komo turista lo drenta na vigur día promé di yüli, si vota riba esaki atrobe. 

“E ordenansa i amienda ku ta introdusí un impuesto pa turista nobo pa Boneiru a pasa ku un mayoría di voto den Konseho Insular dia 12 di aprel último. Despues ku e ordenansa i amienda ambos a keda aprobá, a surgi pregunta tokante kon e proseso a kana, i si esaki a sosodé korektamente”, asina gobièrnu a laga sa. 

Tambe Entidat Públiko Boneiru (EPB) a laga sa ku despues di a hasi un evaluashon húridiko a konkluí ku e proseso a kana korektamente. “Basá riba esaki, gezaghèber komo presidente di Konseho Insular i tambe e grifir a firma e ordenansa nobo i tambe e amienda. Entre tantu e ordenansa I amienda a keda publiká, entre otro riba e wèpsait www.konsehoinsular.com. 

75 dòler

Ku e amienda a ahustá e impuesto pa bira USD 75 pa kada bishita. Pa habitantenan di islanan di anterior Antia Hulandes, i tambe mucha bou di 13 aña, e impuesto ta USD 10 pa persona pa kada bishita.

E impuesto nobo di turista ta bai na vigor dia 1 di yüli próksimo, pa bishitantenan di Boneiru. Pa turistanan ku ta bini ku barku krusero e impuesto nobo di USD 10 pa persona ta bai na vigor entrate 1 di yanuari 2023. 

Pa mas informashon por tuma kontakto ku ofisina di Finansas di Entidat Públiko di Boneiru, via telefon 717-5330 ekstenshon 2624 òf e-meil belasting-olb@bonairegov.com.