Notisia

Impuesto nobo pa turista ta gòlpi mortal pa daytrippers i island-hopping

Un bishita di un dia pa sea Kòrsou òf Aruba ta bira totalmente impagabel pa hende ku no ta inskribí na Boneiru 

KRALENDIJK- Impuesto nobo di 75 dòler pa kada bes ku un tursita stranhero drenta Boneiru por wòrdu konsiderá un gòlpi mortal pa turista ku ke bishitá Boneiru den un dia for di Aruba òf Kòrsou. E turistanan aki lo mester paga 75 dòler meskos ku un turista ku por ehèmpel 10 dia riba e isla. Esaki tambe ta paga mesun 75 dòler, meskos ku e turista ku ta bishitá pa un òf dos dia.

Pero tambe pa e turista ku ta di bishita na Boneiru i ke hasi un bishita kòrtiku na nos islanan hermana lo mester bolbe paga 75 dòler, ora a bula pa sea Aruba i Kòrsou pa un òf dos dia, pa despues regresá Boneiru. 

E impuesto nobo tambe lo por tin un efekto negativo den atraé e asina yama Digital Nomadnan, pa bin traha un par di luna na Boneiru. Tanten ku esakinan no ta formalmente inskrí no Bevolking, e grupo aki tambe lo mester paga 75 dòlar pa kada bes ku nan pone un pia pafó di e isla. Esaki lo hasi Boneiru totalmente no-atraktivo pa e tipo di biahero asina. 

Ta parse ku e miembronan di Konseho Insular no a para ketu ètòl ku e tipo di konsekuensia negativonan aki, ora nan a kore kambia e proposishon di lei nobo, den sentido ku no solamente a hisa e montante ku 50% te na 75 dòler, per alabes a disidí ku lo no kobra esaki un bes pa aña, si no pa kada bes ku un stranhero drenta e isla. Si esaki drenta 10 biaha den un aña lo tin ku paga 750 dòler den un solo aña. 

Famia i amistat

Un detaye ku gobièrnu ta purba skonde, ta ku e impuesto nobo ta bai impaktá no tantu e turista ku sèmper tabata bai keda na hotèl, si no spesialmente e turista ku ta bin keda na famia òf amistat. Esakinan antes no tabata paga nada na impuesto, i awor aki mester bai paga meskos ku kalke otro turista. Esaki ta konta tambe pa studiantenan Boneriano ku ta biba den eksterior, i kalke otro Boneriano bibá pafó di e isla. 

Deel dit artikel
Rocargo
Rocargo
Rocargo
Rocargo