Inisio di biba ku guia pa hóben

Kralendijk- Den un investigashon resien riba e problemátika di adolesente na Hulanda Karibense, e importansia di posibilidat pa akohida di hóbennan vulnerabel ta bin dilanti.

Partikularmente e kombinashon di alohamentu ku guia adishonal ta importante pa por dal e paso pa adultes. P’esei Kuido i Hubentut Hulanda Karibense (ZJCN), riba 15 di mart ta start un proyekto piloto di dos aña Biba ku guia.

E proyekto piloto Biba ku Guia (Begeleid Wonen) ta pa hóbennan di 16 te ku 23 aña na Boneiru, Saba i Sint Eustatius, ku pa tempu largu ta den un trayekto di yudansa serka Kuido pa Hóben i ku mester dal un siguiente paso pa bira mas independiente. E hóbennan akí no por bai kas bèk, pa motibu ku e situashon na kas, no opstante ku a hasi uzo di yudansa pa largu tempu, no ta kambia.

Guia intensivo

Hóbennan den e fasilidat biba ku guia ta haña un trayekto di entrenamentu den fase i intensivo pa siña biba riba nan mes. E trayekto akí ta kuadra ku e yudansa eksistente di Kuido pa Hóben. Basá riba un plan di kresementu personal e hóbennan den e fasilidat di biba ku guia ta pasa tres fase. Kada fase konosé metanan edukativo personal ku ta kuadra ku e grado di independensia di e hóben. Segun e tres fasenan ta progresá, independensia di e hóbennan ta oumentá i e guia lo bira ménos intensivo. E guia ta dirigí entre otro riba ampliashon di e kapasidat pa para riba propio pia, independensia, kuido propio i siña abilidatnan sosial relashonal i práktiko. Meta di biba ku guia ta, pa hóbennan den di dos aña ta apto pa nan mes duna direkshon independientemente na nan bida.

Regiline Sambo, lider di tim di Kuido di Hóben na Kuido i Hubentut Hulanda Karibense (ZJCN): “E fasilidat nobo di biba ku guia lo bai amplia e oportunidatnan den futuro pa un gran kantidat di hóben di Boneiru, Saba i Sint Eustatius.”

Alohamentu i sirkulashon

E proyekto piloto di dos aña ta kuminsá 15 di mart 2021. E fasilidat di biba ku guia ta alohá den un kompleho di apartamentu na Kaya Sabana na Boneiru. Na e momentunan akí ta evaluando huntu ku kooperativa di bibienda Fundashon Cas Bonairiano (FCB), si por konstruí un edifisio nobo, unda por sigui di forma struktural ku e proyekto di biba ku guia. Banda di esei FCB ta investigá si por pone kasnan di hür sosial na disposishon di hóbennan ku finalisá e trayekto di biba ku guia ku éksito, di manera ku por garantisá ku tin sirkulashon di e hóbennan.

Lesa tambe:

• 
  E tim spesialisá di KPCN ta atendé kriminalidat finansiero ekonómiko ku man duru
• 
  Eksposishon “Hende den Naturalesa” den Parke Nashonal Washington Slagbaai
• 
  Paga tinu riba uso di awa | Aviso
• 
  Ròl prominente pa Boneiru na Konferenia tokante Awa di Nashonnan Uní 
• 
  Prevení Zika, Dengue i Chikungunya |Aviso pagá