KRALENDIJK- Scholengemeenschap Bonaire (SGB), Ministerio di Enseñansa, Kultura i Siensia, entidat públiko Boneiru i Fundashon Propiedat Inmobil Boneiru (FPIB) djaluna a anunsiá inisio di e proyekto di konstrukshon nobo. 

A pone e promé pasonan pa realisá un fasilidat moderno di enseñansa ku ta konektá ku e nesesidatnan kresiente di nos isla.

Durante e fase inisial akí di e renobashon, diferente aktividat ta tuma lugá na i rònt di e aktual kompleho di skol na Kaya Frater Odulfinus. Un di e aktividatnan mas remarkabel di preparashon ta demolishon di e oula, loke lo traha espasio pa e konstrukshon nobo planiá. Esaki ta simbolisá inisio di un era di modernisashon di e ubikashon di SGB na Kaya Frater Odulfinus. 

Pa garantisá un ehekushon sin muchu problema di e proyekto i siguridat di e alumnonan, studiantenan, dosentenan i bishitantenan, ta bai adaptá e tereno di SGB. Esaki ta enserá ku ta bai pone e entrada prinsipal na un otro sitio ku ta spesialmente designá pa esaki. E kambio di e entrada prinsipal ta na mes momentu un señal pa ranka sali ku vários mehorashon na e tereno parti pafó di e ubikashon di SGB. 

Banda di esaki temporalmente ta pone un parti di e lugá pa stashoná outo direktamente banda di e lugá aktual pa stashoná outo, loke lo salbaguardiá siguridat i komodidat di tur esnan enbolbí durante konstrukshon di e kompleho di skol nobo. E partidonan ta pidi pa komprenshon i koperashon durante e periodo di transishon akí, ku ta esensial pa mehorashon di e edifisio di skol. Despues di realisashon di e edifisio di SGB-MBO, SGB huntu ku FPIB lo sigui traha riba un kompleho di skol mehorá den forma di konstrukshon nobo di e edifisio di VMBO i SLP. E intenshon ta ku e ubikashonnan ta kumpli ku standartnan di konstrukshon i eksigensianan teknológiko di awendia.

Sostenibilidat

Tambe mas tantu posibel ta pone énfasis riba sostenibilidat i aspektonan ekológiko, ku bista riba un ambiente di siña saludabel i bèrdè. Finalmente ta tuma medida pa mehorá aksesibilidat di e skolnan, entre otro konstrukshon di un mihó infrastruktura i fasilidat pa alumnonan i studiantenan ku limitashon físiko. E proyekto di konstrukshon nobo ta forma parti di e programa di alohamentu di enseñansa ku a keda desiñá minusiosamente den kolaborashon ku outoridatnan lokal di enseñansa i e ta un inisiativa ambisioso ku ta hisa infrastruktura di institutonan di enseñansa na nos isla na un nivel mas haltu.