KRALENDIJK – E ponementu riba inaktivo di e direktor di unidat di e sekshon VMBO na Komunidat di skolnan na Boneiru (SGB) a kondusí na inkietut bou di e tim di dosente e siman aki.
Diferente dosente a posishoná nan mes solidario ku e direktor ku a suspendé, loke a okashoná tenshon dentro di e organisashon di skol – hustamente den un periodo kaminda èksamennan sentral final a kuminsá.
E motibu pa e medida lo ta entre otro un rapòrt krítiko di inspekshon pa loke ta trata e sekshon di VMBO. Gerente di SGB a pone Entidat Públiko Boneiru anteriormente e siman aki na altura di e situashon.
Despues di e anunsio Diputado di Enseñansa, Nina den Heyer, a hasi un yamada pa trankilidat i koperashon. Den konsulta ku e gerensia di skol i sindikato el a enfatisá ku e enfoke mester ta awor kompletamente riba e alumnonan. “Ningun alumno no mag bira víktima di e situashon aki,” segun Den Heyer.
Solushon
Gobièrnu ta insistí pa un solushon rápido, di moda ku por finalisá e periodo di èksamen den un ambiente di studia seif i trankil. “Un skol harmonioso ta na interes di tur hende,” segun e diputado.