WILLEMSTAD- E insidente siman pasá djaluna, 14 di ougùstùs 2023, kaminda ku un porta di un avion a bula habri den pleno buelo entre Aruba i Kòrsou a laga algun interogante atrás, ámbos serka pasaheronan ku tabata riba e buelo, komo ku e públiko general.

Durante e último buelo di dia ku e aerolinea a ehekutá di Aruba pa Boneiru, segun un pasahero di Aruba a konta, e porta di e avion a bula habri, na momentu ku e avion tabata yegando Kòrsou. Danki dios no tabata tin ningun persona ku a keda heridá, pero e pasaheronan a keda ku sustu sí.

Banda di e lokual ku a sosodé riba su mes, hopi hende ta kuestioná dikon Divi Divi no a pone mas atenshon na bienestar di e paseheronan ku tabata riba e buelo en kestion. Tambe mester bisa ku Divi Divi no a komuniká di forma pro-aktivo riba e insidente.

Komunikashon habrí

Si no tabata pa un persona en kestion ku a buska kontakto ku prensa, niun hende lo no tabata sa di e insidente. Por spera di un kompania responsabel, manera Divi Divi Air, ku nan ta komuniká di forma serio i habrí pa duna informashon tokante e insidente, i tambe pa splika kiko e kompania lo hasi pa evitá ku algu similar lo por bolbe pasa.